ADABIYOT NAMOYONDASI BILAN SUHBAT
Adabiyot, badiiy asarlar insonning ma'naviyatini yuksaltiradigan, uni komillikka yetishtiradigan beqiyos qudratdir. Adabiyotga oshno kishilarning qalbi ham hamisha ezgulikka yo'g'rilgan, atrofga mehr-muhabbat ko'zi bilan nazar soladigan bo'ladi. Bu kabi adabiyot darg'alarining davralarida bo'lib, suhbatlaridan bahramand bo'lish o'zgacha zavq-shavq bag'ishlaydi.
2022-yilning 31-mart kuni Buxoro davlat universiteti Filologiya fakultetiga O'zR Fanlar Akademiyasi O'zbek tili, adabiyoti va folklori instituti dotsenti Raxmatilla Barakayev tashrif buyurdilar. Fakultetning 2-bosqich talabalari bilan suhbat o'tkazildi. Muloqot davomida ustozimiz buyuk yozuvchi va shoirlarning - Alisher Navoiy, Abdulla Avloniy, Usmon Nosir, Muhammad Yusuf kabilarning ijodlaridan namuna keltirib, tahlil qildilar.
Shuningdek, mustaqillikdan ilgari yaratilgan asarlarning biz bilgan va bilmagan qirralari, ma'no-mazmuni hamda bugungi kundagi talqini haqida so'z yuritdilar. Ayniqsa, Xudoyberdi To'xtaboyev ijodlariga birmuncha ahamiyat berildi. Adib asarlarining yaratilish davri, sharoiti, qanday maqsad ko'zlanganligi haqida R. Barakayev mulohaza yuritib, tahlil qilib berdilar. Chunki bu kabi asarlarning yaratilish davri bevosita urush davriga to'g'ri kelgan, yaratilgan asarlarning aksariyatida esa urush nafasi ufurib turadi. Shu kabi asarlar yuzasidan ustozimiz biz talabalarga ma'lumot va kerakli tavsiyalar berdilar.
Davra suhbati so'ngida fakultet dekani D. Z. Rajabov hamda talabalar tomonidan mazmunli muloqot hamda maslahatlar uchun ustozimiz R. Barakayevga tashakkur bildirildi.