BuxDUda bitiruvchilar bandligi va karyera markazi faoliyati o‘rganildi
BuxDUda bitiruvchilar bandligi va karyera markazi faoliyati o‘rganildi
O‘zbekiston Respublikasi Prezidenti Administratsiyasi huzuridagi Ta’lim sifatini ta’minlash milliy agentligi direktori Baxtiyor Yo‘ldoshev hamda Buxoro davlat universiteti rektori Obidjon Xamidov BuxDUda tashkil etilgan Bandlik va karyera markazi faoliyati bilan yaqindan tanishdilar.
Tashrif davomida bitiruvchi talabalarni ish bilan ta’minlash mexanizmlari, yirik ish beruvchi korxonalar bilan o‘rnatilgan hamkorlik aloqalari hamda talabalarning professional ko‘nikmalarini shakllantirish borasidagi ishlar ko‘zdan kechirildi. Xususan, markazda yo‘lga qo‘yilgan raqamli monitoring tizimi, bitiruvchilarning bandligini bkm-buxdu.uz platformasi orqali tahlil qilib borish hamda yosh mutaxassislarga rezyume tayyorlashda ko‘rsatilayotgan maslahat xizmatlariga alohida e’tibor qaratildi.
Agentlik direktori ta’lim sifatini ta’minlashda bitiruvchilarning mehnat bozoridagi o‘rni va ularning o‘z mutaxassisligi bo‘yicha ishga joylashishi eng asosiy ko‘rsatkich ekanligini ta’kidladi. Markazda yaratilgan zamonaviy sharoitlar va ish beruvchilar bilan tizimli ishlash amaliyoti yuqori baholandi. Buxoro davlat universiteti rahbariyatining bitiruvchilar karyerasini qo‘llab-quvvatlashga qaratilgan ushbu tashabbusi oliy ta’lim va mehnat bozori integratsiyasini mustahkamlashda muhim ahamiyat kasb etishi qayd etildi.
