BuxDUda qorako‘llik bitiruvchi yoshlar uchun ochiq muloqot va bo‘sh ish o‘rinlari yarmarkasi tashkil etildi
BuxDUda qorako‘llik bitiruvchi yoshlar uchun ochiq muloqot va bo‘sh ish o‘rinlari yarmarkasi tashkil etildi
Bugun, 9-iyun kuni Buxoro davlat universitetida Qorako‘l tumani hokimligi mutasaddilari, ish beruvchilar hamda universitetni tamomlayotgan qorako‘llik bitiruvchi yoshlar ishtirokida “Rahbar va yoshlar” uchrashuvi bo‘lib o‘tdi. Tadbirda tuman hokimining o‘rinbosari Feruz To‘xtamurotov hamda universitetning o‘quv ishlari bo‘yicha prorektori Rustam Jumayev bitiruvchilarning bandligini ta’minlash borasidagi ustuvor vazifalarga to‘xtaldilar.
Muloqot davomida talabalarga zamonaviy mehnat bozori talablari va ish qidirishning raqamli imkoniyatlari haqida batafsil ma’lumot berildi. Xususan, bitiruvchilarga Vacancy.argos.uz hamda Career.edu.uz platformalari orqali ro‘yxatdan o‘tish, shaxsiy rezyumelarni joylashtirish va davlat xizmatidagi bo‘sh ish o‘rinlarini kuzatib borish tartiblari amaliy misollar bilan tushuntirildi. Tadbirda tumaning yirik ish beruvchilari, jumladan, “Parvoz Humo ravnaq trans” MCHJ rahbari Nirmuhammad Achilov ham ishtirok etib, yosh mutaxassislar uchun mavjud vakant o‘rinlari va yaratilgan sharoitlar haqida so‘zlab berdi.
Ochiq muloqot tarzida kechgan uchrashuvda bitiruvchilar o‘z mutaxassisliklari bo‘yicha ishga joylashish, imtiyozli kreditlar olish va tadbirkorlik faoliyatini yo‘lga qo‘yish yuzasidan o‘zlarini qiziqtirgan savollariga mas’ullardan javob oldilar. Ko‘plab talabalar uchrashuvning o‘zidayoq tuman korxona va tashkilotlari bilan dastlabki kelishuvlarga erishdilar. Mazkur tadbir yosh mutaxassislarning o‘z hududlarida munosib ish o‘rinlariga ega bo‘lishlarida muhim ko‘prik bo‘lib xizmat qildi.
