BuxDUda yangi o‘quv yiliga puxta tayyorgarlik: Jismoniy tarbiya va sport fakultetida yig‘ilish bo'lib o'tdi
BuxDUda yangi o‘quv yiliga puxta tayyorgarlik: Jismoniy tarbiya va sport fakultetida yig‘ilish bo'lib o'tdi
27-avgust kuni Buxoro davlat universiteti Jismoniy tarbiya va sport fakultetida 2025–2026-o‘quv yilini samarali tashkil etish bo‘yicha yig‘ilish bo‘lib o‘tdi. BuxDU rektori Obidjon Xamidov boshchiligidagi ishchi guruh fakultet kafedralari faoliyatini o‘rganib, ta’lim jarayonining sifatini oshirish, ilmiy-tadqiqot ishlarini rivojlantirish, bitiruvchilar bandligini ta’minlash, sportchi talabalar tayyorgarligini kuchaytirish bo‘yicha amalga oshirilgan ishlar tahlil qilindi.
Yig‘ilishda o‘quv ishlari samaradorligi muhokama qilinib, 2025–2026-o‘quv yili uchun qabul kvotalari va natijalari, fan syllabusi va o‘quv rejalarining takomillashtirilishi, o‘qituvchilarning shaxsiy ish rejalarini samarali tashkil etish bo‘yicha tahliliy ma’lumotlar taqdim etildi. Shuningdek, sport mashg‘ulotlari sifati, trenerlik maktabini rivojlantirish, ustoz-shogird an’analarini kengaytirish hamda xalqaro akkreditatsiya jarayonlari natijalari muhokama qilindi.
Yig‘ilishda ma’naviy-ma’rifiy ishlar samaradorligi ham ko‘rib chiqildi. Fakultetda talabalarning ma’naviy olamini boyitish, ularni milliy va umuminsoniy qadriyatlar ruhida tarbiyalash, yoshlar o‘rtasida kitobxonlikni kengaytirish, sportchilar orasida sog‘lom turmush tarzini targ‘ib qilish hamda ijtimoiy-ma’naviy muhitni yanada mustahkamlash bo‘yicha amalga oshirilgan ishlar yuzasidan hisobot berildi.
Shuningdek, yig‘ilish doirasida korrupsiyaga qarshi kurashish va komplayens nazorat tizimini kuchaytirish masalalari muhokama qilinib, fakultetda halollik tamoyillarini mustahkamlash va ochiqlikni ta’minlash bo‘yicha amalga oshirilgan ishlar taqdim etildi.
Tadbir yakunida fakultetda yangi o‘quv yilini yuqori saviyada boshlash, ta’lim, ilm-fan va sport sohasida innovatsion yondashuvlarni qo‘llash, sport to‘garaklarini jonlantirish, talabalar ishtirokini ko‘paytirish, bitiruvchi talabalarning imtiyozli kreditlar orqali o‘z bandligini ta’minlashini qo‘llab-quvvatlash, shuningdek, ma’naviy-ma’rifiy ishlarni tizimli davom ettirishga qaratilgan kompleks vazifalar belgilab olindi.
