Buxoro tuman hokimi va BuxDU bitiruvchi yoshlari o‘rtasida ochiq muloqot bo‘lib o‘tdi
Buxoro tuman hokimi va BuxDU bitiruvchi yoshlari o‘rtasida ochiq muloqot bo‘lib o‘tdi
Bugun, 9-iyun kuni Buxoro davlat universitetida Buxoro tumani hokimi Anvarjon Ochilov hamda ushbu tumanda istiqomat qiluvchi bitiruvchi talabalar ishtirokida "Hokim va yoshlar" uchrashuvi tashkil etildi. Tadbirda universitet rahbariyati, tuman mas’ullari hamda yirik ish beruvchi korxona va tashkilotlar rahbarlari ishtirok etishdi.
Uchrashuv avvalida universitet rektori Obidjon Xamidov bitiruvchi yoshlarning bandligini ta’minlash borasidagi zamonaviy imkoniyatlar haqida to‘xtaldi. Xususan, talabalarga Vacancy.argos.uz hamda Career.edu.uz kabi raqamli platformalar orqali ish qidirish, shaxsiy rezyumelarni joylashtirish va bo‘sh ish o‘rinlari haqida tezkor ma’lumot olish tartiblari batafsil tushuntirildi. Rektor yoshlarni mehnat bozorida raqobatbardosh bo‘lish uchun ushbu platformalardan samarali foydalanishga chaqirdi.
Ochiq muloqot tarzida o‘tgan tadbirda talabalar o‘zlarini qiziqtirgan savollar va bandlik masalasidagi takliflari bilan bevosita tuman hokimi hamda ish beruvchilarga murojaat qildilar. Masalan, Iqtisodiyot fakulteti bitiruvchisi Farrux Fatilloyev o‘qishini magistratura bosqichida davom ettirish bilan birga, bank sohasida amaliy tajriba orttirish istagini bildirdi. Uning murojaati joyida ko‘rib chiqilib, Buxoro tumani Agrobank filiali tomonidan talabaga ish taklif qilindi. Muloqot davomida yana ko‘plab bitiruvchilar mutaxassisliklari bo‘yicha munosib ish o‘rinlariga ega bo‘ldilar.
