Buxoro tumani hokimi va talaba-yoshlar uchrashuvi bo'lib o'tdi.
Bugun, 12-may kuni, Buxoro davlat universiteti katta yig'ingohida Buxoro tumani hokimi Ochilov Anvarjon Zabaydulloyevich, tuman mutasaddilari, ish beruvchi korxona va tashkilotlar rahbarlari, BuxDU rektori O.X.Xamidov boshchiligidagi rahbariyat, pedagog-xodimlar hamda talaba-yoshlar ishtirokida "Hokim va yoshlar" uchrashuvi bo'lib o'tdi.
Uchrashuv qizg'in savol-javoblarga boy bo'ldi. Xususan, BuxDU 1-kurs talabasi Mironshox ayni paytda "Sharq" mehmonxonasida faoliyat yuritayotganini aytib, bugungi kunda uy mehmonxonasi ochish uchun yoshlarga qay tartibda ko'mak berilishini so'radi. Tumandagi turizm bo'yicha mas'ullar tomonidan beriladigan imkoniyatlar batafsil tushuntirildi. Shuningdek, Milliy bank xodimi Dilshod Ochilov tomonidan talabalar uchun ajratiladigan imtiyozli kredit paketlari haqida ma'lumot berildi.
Hozirgi kunda Buxoro tumanida faoliyat yuritayotgan hamda qad rostlayotgan korxonalarga BuxDU professor-o'qituvchilari hamda talabalari tashrif buyurib sharoitlarni ko'rishi hamda kelgusida o'sha tashkilotda ish yuritish uchun imkoniyatlar bilan yaqindan tanishishi mumkinligiga kelishildi. Haftaning har shanba kuni Buxoro tumani hokimiyati binosida Buxoro davlat universiteti talabalari uchun hokim qabuli belgilandi.
