Buxoroda BuxDU bitiruvchilarining bandligini ta’minlash bo‘yicha manzilli ishlar olib borilmoqda
Buxoroda BuxDU bitiruvchilarining bandligini ta’minlash bo‘yicha manzilli ishlar olib borilmoqda
Ayni kunlarda Buxoro viloyati ishchi guruhi ko‘rsatmasiga asosan Buxoro davlat universitetida bitiruvchi yoshlarning bandligini ta’minlash va ularni ijtimoiy qo‘llab-quvvatlashga qaratilgan individual muloqotlar o‘tkazilmoqda. Uchrashuvlar davomida bitiruvchilarga O‘zbekiston Respublikasi Prezidentining “Kelajakka qadam” dasturi doirasida taqdim etilayotgan imtiyozlar, xususan, yosh tadbirkorlar uchun ajratilayotgan imtiyozli kreditlar, ularning shartlari va moliyaviy qo‘llab-quvvatlash mexanizmlari haqida batafsil tushuntirishlar berilmoqda. Har bir bitiruvchi bilan o‘tkazilayotgan yuzma-yuz suhbatlarda ularning kelajakdagi maqsadlari, magistratura bosqichida o‘qishni davom ettirish istagi yoki tadbirkorlik faoliyatini yo‘lga qo‘yish bo‘yicha rejalari alohida o‘rganilib, ma’lumotlar bazasi shakllantirilmoqda.
Mazkur jarayon bitiruvchilarni kasbiy faoliyatga to‘g‘ri yo‘naltirish va ularning mehnat bozorida munosib o‘rin egallashlariga ko‘maklashishda muhim ahamiyat kasb etadi. To‘plangan tahliliy ma’lumotlar asosida kelgusida har bir yoshga individual tartibda amaliy yordam ko‘rsatish va ularning bandligini kafolatli ta’minlash choralari ko‘riladi. Buxoro davlat universiteti ma’muriyati bitiruvchilarning har bir murojaatini e’tiborga olib, ularning professional yuksalishi uchun zarur sharoitlarni yaratishda davom etmoqda.
