Huquq-tartibot sohasi: Bilimli yoshlar uchun yangi imkoniyatlar.
Huquq-tartibot sohasi: Bilimli yoshlar uchun yangi imkoniyatlar.
Buxoro davlat universitetida talaba-yoshlarning huquqiy savodxonligini oshirish, ularni vatanparvarlik ruhida tarbiyalash va ichki ishlar organlari faoliyati bilan yaqindan tanishtirish maqsadida navbatdagi ochiq muloqot bo‘lib o‘tdi. Uchrashuvda Buxoro viloyati IIB huzuridagi Qo‘riqlash boshqarmasi boshlig‘i, polkovnik Sherzod Jumayev boshchiligidagi tizim rahbariyati ishtirok etdi.
Muloqot davomida quyidagi masalalarga alohida to‘xtalib o‘tildi:
Ichki ishlar organlari, xususan, Qo‘riqlash xizmati tizimida xizmat qilishning o‘ziga xos mas’uliyati va sharafi;
Tizimga ishga kirish tartibi, nomzodlarga qo‘yiladigan zamonaviy talablar va mezonlar;
Xodimlarga yaratilgan ijtimoiy himoya, imtiyozlar va martaba pog‘onalaridan ko‘tarilish imkoniyatlari.
Polkovnik Sh. Jumayev o‘z so‘zida bugungi islohotlar davrida sohada bilimli, zamonaviy texnologiyalarni egallagan va jismonan baquvvat yosh kadrlar uchun barcha eshiklar ochiq ekanligini ta’kidladi hamda talabalarga huquq-tartibot posboni bo‘lish yo‘lidagi muhim tavsiyalarini berdi.
Tadbir yakunida talabalar o‘zlarini qiziqtirgan savollar, jumladan, tanlov bosqichlari, xorijiy tillarni bilish darajasining ahamiyati va xizmat davridagi sport tayyorgarligi kabi mavzularda atroflicha javoblar oldilar.
Uchrashuv yoshlarda ushbu sharafli kasbga nisbatan qiziqish va hurmat hissini yanada oshirishga xizmat qildi.
