Kogon shahri hokimi va talaba-yoshlar uchrashuvi bo'lib o'tdi.
Buxoro davlat universitetida belgilangan grafik asosida har bir tuman va shahar hokimlari hamda talaba-yoshlar bilan uchrashuvlar davom etmoqda. Bugun, 13-may kuni, BuxDU katta yig'ingohida Kogon shahar hokimi To'raboyev Mirshakar Muzaffarovich, Milliy bank xodimlari, ish beruvchi korxona va tashkilotlar rahbarlari, BuxDU rektori boshchiligidagi universitet jamoasi, talaba-yoshlar ishtirokida uchrashuv o'tkazildi.
Uchrashuv avvalida so'zga chiqqan hokim BuxDU bitiruvchilari bilan Kogon shahar hokimiyati binosida yig'ilish o'tkazib, barcha yoshlarni ish bilan ta'minlash maqsadida rejalar tuzilayotganligini aytdi. Shuningdek, universitet tomonidan Kogonlik bitiruvchiga ijobiy tavsiyanoma berilgan taqdirda, tashkilotlarda hech qanday tanlovsiz ishga qabul qilinishi haqida ma'lum qildi.
Uchrashuvda Kogon shahrida voyaga yetib, "El-yurt umidi" stipendiyasi sovrindori sifatida o'qishini chet elda davom ettirayotgan yoshlar ham video qo'ng'iroq orqali ishtirok etishdi. Ulardan biri Javlon Jamilov BuxDU bitiruvchisi, hozirda Italiyaning nufuzli oliy ta'lim muassasasida magistratura bosqichida tahsil olmoqda. Javlon talabalarga stipendiya hamda chet elda o'qish haqida ma'lumotlar berib, yoshlarga omad tiladi.
Shuningdek, uchrashuvda talabalar o'zlarini qiziqtirgan savollarga javob olishdi. Jumladan, Xorijiy tillar fakulteti talabasi Gulasal IELTS imtihonidan 7.5 ballni qo'lga kiritib, bugungi kunda qiziquvchilarga dars o'tayotganligini hamda ushbu faoliyatni markaz sifatida davom ettirish uchun amaliy ko'mak so'radi. Kogon shahar hokimi tegishli tartibda qo'llab-quvvatlashini bildirdi.
