Mehnat yarmarkasida Buxoro tumanida mavjud bo'sh ish o'rinlari tanishtirildi
Bugungi kunda mamalakatimizda yoshlarni ish bilan band qilish, ularning bo'sh vaqtini mazmunli o'tkazishini ta'minlash va shu orqali iqtisodiyotda ishsizlik darajasini kamaytirish maqsadida davlatimiz rahbarining bir qator ko'rsatma va topshiriqlari berilgan. Berilgan vazifalar ijrosini ta'minlash maqsadida esa universitetimizda ham rejaga asosan bandlikni ta'minlashga ko'maklashuvchi bir qator tadbirlar o'tkazilishi rejalashtirilgan. Xuddi shunday tadbirlardan biri bugun, 29-avgust kuni Buxoro tumanida bo'lib o'tdi.
Buxoro tuman Kambag'allikni qisqartish va bandlik vazirligi hududiy bo'limi, tuman Aholi bandligiga ko'maklashish markazi, tuman "Ishga marhamat" monomarkazi hamkorligida Buxoro tuman Iqtisodiyot kollejida tashkil etilgan bo'sh ish o'rinlari yarmarkasida tumandagi ilg'or tadbirkorlar va va ishlab chiqarish korxonalari o'zlarining vakant ish o'rinlari bilan ishtirok etdilar. Tashrif buyurganlar o'zlarini qiziqtirgan savollarga javob oldilar.
Jumladan, Buxoro tumanidagi "Gold Buxara Tekstil Group" mas'uliyati cheklangan jamiyati tomonidan tashrif buyurganlar e'tiboriga 5 ta vakant ish o'rni, "Grand Buxara Plus Trade" mas'uliyati cheklangan jamiyati tomonidan 15 ta vakant ish o'rni, "Rostexstroy" mas'uliyati cheklangan jamiyati tomonidan 30 ta ish o'rni, tuman Tibbiyot birlashmasi tomonidan 15 ta vakant ish o'rni va eng ko'p "Milmaxtrade" mas'uliyati cheklangan jamiyati tomonidan 200 ta bo'sh ish o'rinlari taklif etildi. Asosan, tikuv fabrikalari, tekstil mahsulotlari ishlab chiqarish sexlari hamda qishloq xo'jaligi mahsulotlarini sazqlash va qayta ishlash korxonalari tomonidan taklif etilgan bo'sh ish o'rinlari yig'ilganlarda qiziqish uyg'otdi. Natijada yarmarkaning o'zida 15 nafar yoshlar bilan mehnat shartnomasi imzolashga erishildi va ishni ertasi kundanoq boshlashlari mumkinligi ma'lum qilindi.
Tadbir so'ngida shu kabi mehnat yarmarkalarinining sonini ko'paytirish va aholiga mavjud bo'sh ish o'rinlari haqida ko'proq ma'lumot berish uchun yaqin kunlarda yana bir mehnat yarmarkasi tasshkillashtirilishi aytib o'tildi.
