Semurg' sport majmuasida Buxoro viloyati Kambag'allikni qisqartirish va bandlik bosh boshqarmasi tomonidan “Bo‘sh ish o‘rinlari mehnat yarmarkasi” bo'lib o'tdi.
Tadbirda 100dan ortiq korxonalar, asosan, yirik ish o‘rinlari bazasiga ega “Artel” kompaniyasi, “OPASCA GmbH” xorijiy qo‘shma korxonasi, davlat va nodavlat tijorat banklari hamda viloyat miqyosida vakant ish o‘rinlari bilan Viloyat Kambag‘allikni qisqartirish va bandlik bosh boshqarmasining hududiy bo‘linmalaridan mas’ullar ishtirok etishdi. Korxona va tashkilotlar 10 mingga yaqin bo‘sh ish o‘rinlarini ish topish istagida bo‘lganlar e’tiboriga taqdim etishdi.
Mehnat yarmarkasi haqida oldindan Buxoro davlat universiteti talabalari diqqatiga yetkazish maqsadida BuxDU Marketing va karyera bo‘limi hamda universitet rasmiy telegram havolalari orqali e’lon berildi hamda shu kunga qadar ishsiz qolib kelayotgan 2023/2024-o‘quv yili bitiruvchilari bo‘lim mas’ullari tomonidan qo‘ng‘iroq orqali yetkazildi.
Bugungi kunda bo‘sh vaqtini mazmunli tashkil etish istagida o‘z mutaxassisligiga mos ish izlab yurgan yoshlar ham ishtirok etishib, taklif etilayotgan vakant ish o‘rinlari bilan tanishib chiqishdi. Mas’ullar bilan yuzma-yuz suhbatda bo‘lib, ish o‘rnida yaratilgan sharoitlar va ish beruvchining talablari bilan fikr almashdilar. Davlat sektorida ishlash istagida bo‘lgan talabgorlar o‘z ariza va rezyumelarini https://vacancy.argos.uz hukumat portali orqali qoldirishlari mumkinligini bildirishdi. Bundan tashqari, yana ko‘plab vakansiyalar haqida elektron https://my.mehnat.uz Yagona milliy mehnat tizimida topishlari ta’kidlandi.
Bundan tashqari, xususiy tadbirkorlik faoliyatini boshlamoqchi bo’lgan yoshlarga ajratilayotgan imtiyozli kreditlar to‘g‘risida ma’lumot berildi.
Yarmarka yakunida o’rganishlar natijasiga ko’ra, universitetni bakalavriat yo’nalishlari va magistratura ta’lim mutaxassisliklarida o’qishni tamomlagan jami 50 nafar bitiruvchi jalb qilinib, shulardan 12 nafari xususiy sektorda ishga joylashtirilishiga erishildi.
