Shofirkon tumani hokimi va shofirkonlik talabalar uchrashuvi boʻlib oʻtdi.
Buxoro davlat universitetida Shofirkon tuman hokimi Fayzilloyev Alisher Abdilloyevich, universitet rahbariyati, professor-oʻqituvchilar, shofirkonlik talaba-yoshlar hamda bitiruvchilar ishtirokidagi uchrashuv tashkil etildi.
Uchrashuvni BuxDU Ilmiy ishlar va innovatsiyalar bo‘yicha prorektori K.Samiyev kirish so'zi bilan ochib berdi. Shuningdek, Shofirkon hokimi so'zga chiqib, yoshlarga yaratilayotgan keng imkoniyatlar haqida aytib o'tdi. Jumladan, tumanda turizmni rivojlantirish uchun amalga oshirilayotgan ishlar, yoshlar uchun ajratilayotgan imtiyozli kreditlar, texnologiyalarni takomillashtirish borasidagi bir qator chora-tadbirlarni ta'kidlab o'tdi.
Uchrashuv qizg'in savol-javoblarga boy bo'ldi. Talaba Aleksandra Is'haqova tumanda volontyorlar markazini ochish taklifi bilan chiqdi. 1-bosqich talabasi Shaxnoza Asadova esa yozgi ta'til davomida oromgohlarda bolalar uchun psixologik treninglar tashkil etish rejasi borligini aytdi.
Tumandagi Ijtimoiy ish, Bandlik, Yoshlar agentligi, Xalq ta'limi bo'limlari rahbarlari uchrashuvda ishtirok etib, o'z sohalaridagi taklif va murojaatlarga manzilli yechim topishdi. Hokim boshchiligidagi jamoa har bir taklifni batafsil o'rganib, amaliy ko'mak berishdi.
