Vobkent tuman hokimi hamda talaba-yoshlar uchrashuvi
Buxoro muhandislik-texnologiya instituti faollar zalida Vobkent tuman hokimi Farxod Umarov ishtirokida viloyat oliy ta’lim muassasalarining vobkentlik bitiruvchi yoshlari bilan bo‘sh ish o‘rinlari asosida bitiruvchi talabalarni ishga joylashish va ularning muammolarini imkon qadar hal etish yuzasidan uchrashuv bo‘lib o‘tdi.
Muloqotda tuman hokimi o‘rinbosarlari, tashkilot-korxona rahbarlari, kambag‘allikni qisqartirish va aholi bandligiga ko‘maklashish markazi xodimlari, tumandagi maktabgacha va maktab ta’limi bo‘limi, tibbiyot birlashmasi rahbarlari hamda 200 nafardan ortiq mazkur OTM bitiruvchi talabalari ishtirok etishdi.
Muloqot davomida tuman hokimi Farxod Umarov mamlakatimizda keyingi yillarda yoshlarni qo‘llab-quvvatlash, ularning o‘z iqtidor va salohiyatlarini yuzaga chiqarishlari uchun keng imkoniyatlar yaratib berilayotganligi, davlatimiz rahbarining tashabbusi bilan oliy o‘quv yurtlari moddiy-texnika bazasini mustahkamlash, ilmiy salohiyatini yuksaltirish, ta’lim sifatini xalqaro andozalar darajasiga ko‘tarish, iqtidorli yoshlarni qo‘llab-quvvatlash va rag‘batlantirish masalalariga alohida e’tibor qaratilayotganligi xususida atroflicha fikr-mulohazalar bildirdi va Buxoro muhandislik-texnologiya instituti hamda Vobkent tuman hokimligi o‘rtasida hamkorlik Memoriandumi imzolandi.
Ochiq muloqotda vobkentlik bitiruvchi talabalarni ish bilan ta’minlash, bu boradagi mavjud imkoniyatlar, joriy o‘quv yilida viloyat OTMlarini tamomlayotgan 300 ga yaqin talabalarni mutaxassisligi bo‘yicha ish bilan ta’minlash masalalari atroflicha muhokama etildi.
Ochiq, samimiy tarzda o‘tgan muloqot davomida tuman hokimi Farxod Umarov bitiruvchi yoshlarni qiziqtirgan barcha savollarga batafsil javob qaytardi. Shuningdek bitiruvchilarning to‘lov kontrakt pullarining bir qismi tuman hokimligi tomonidan to‘lab beriladigan va murojaatda bo‘lgan yoshlarni ish bilan ta’minlash borasida kelishib olindi.
Uchrashuvda mutasaddilarga yosh mutaxassislarni tegishli tashkilotlarga ishga joylashtirish bo‘yicha vazifalar yuklatildi. Muloqot davomida faol bo‘lgan bitiruvchilarga sovg‘alar va kitoblar sovg‘a qilindi.
