YANGI TA’LIM YO‘NALISHLARI UCHUN MAXSUS DAVLAT AKKREDITATSIYASIGA TAYYORLIK BO‘YICHA MUHIM UCHRASHUV O‘TKAZILDI.
YANGI TA’LIM YO‘NALISHLARI UCHUN MAXSUS DAVLAT AKKREDITATSIYASIGA TAYYORLIK BO‘YICHA MUHIM UCHRASHUV O‘TKAZILDI
2026–2027 o‘quv yilida yangi ta’lim yo‘nalishlari va mutaxassisliklarini tashkil etishda maxsus davlat akkreditatsiyasidan o‘tkazishga tayyorgarlik ko‘rish masalalariga bag‘ishlangan muhim strategik uchrashuv bo‘lib o‘tdi. Unda kafedra mudirlari, mas’ul bo‘lim rahbarlari va ta’lim jarayoniga bevosita daxldor mutaxassislar ishtirok etdi.
Uchrashuv davomida Ta’lim sifatini nazorat qilish bo‘limi boshlig‘i Z. Nurov, O‘quv-uslubiy departament boshlig‘i S. Davlatov hamda Bandlik va karyera bo‘limi boshlig‘i S. Hamidov tomonidan oliy ta’lim dasturlarini maxsus davlat akkreditatsiyasidan o‘tkazish bo‘yicha amaldagi talablar, mezonlar va tartib-tamoillar yuzasidan atroflicha tushuntirishlar berildi.
Xususan, Oliy taʼlim tashkilotlarining taʼlim dasturlarini maxsus davlat akkreditatsiyasidan oʻtkazishda baholash mezonlari boʻyicha indikatorlar asosida hujjatlarini tayyorlash, o‘quv rejalari va fan dasturlarini zamonaviy talablar asosida yangilash, ta’lim sifatini baholashning samarali mexanizmlarini joriy etish hamda akkreditatsiya jarayoniga oid hujjatlarni puxta va sifatli tayyorlash masalalari muhokama qilindi.
Tadbirda yangi ta’lim yo‘nalishlarini ochishda mehnat bozori ehtiyojlari, ish beruvchilar bilan hamkorlikni kuchaytirish, bitiruvchilarning bandligini ta’minlash, amaliyotga yo‘naltirilgan o‘quv dasturlarini joriy etish hamda innovatsion ta’lim texnologiyalaridan keng foydalanish zarurligi alohida ta’kidlandi.
Shuningdek, professor-o‘qituvchilar salohiyatini oshirish, ilmiy-tadqiqot faoliyatini rivojlantirish, talabalar uchun zamonaviy bilim, ko‘nikma va kompetensiyalarni shakllantirish orqali raqobatbardosh kadrlar tayyorlash ustuvor vazifa ekani qayd etildi.
Mazkur uchrashuv oliy ta’lim tizimida sifatni yangi bosqichga olib chiqish, zamonaviy va raqobatbardosh ta’lim yo‘nalishlarini yo‘lga qo‘yish hamda xalqaro talablar asosida yuqori malakali kadrlar tayyorlash yo‘lidagi muhim va strategik qadam sifatida xizmat qiladi.
